عام من الثوره

Posted: 2012/02/15 in فضفه عن الثوره

25 يناير 2011

بدأت اول دعوه للثوره فى مصر .. معتقدش انى كنت مصدق اصلا ان ممكن يحصل حاجه , ما احنا ياما سمعنا عن اضراب وناس ضد مبارك وفى النهايه المصير واحد .. التخشيبه

نزلت يوم جمعة الغضب وشوفت حرق قسم الازبكيه وكسر الخزنه فى الشارع وبدء نزول دبابات الجيش للتحرير ورمسيس , نزلت على طول اول ما خلصت شغل وشوفت فرض حظر التجول .. خطاب مبارك لم اكنت انتوى ووقوف الجيش على حد زعمهم وقتها مع الشعب والناس فوق المدرعات وبتتصور ..

لحد خطاب التنحى الى اتفاجأنا بيه وفى لحظه ركبنا ونروحنا احتفلنا فى الميدان ……..

مرورا باحداث كتييييييييييييييييييير من شفيق الراجل البلوفر صاحب البونبونى الشهير ثم عصام شرف , احداث محمد محمود ومجلس الوزراء وماسبيرو واكتر من حادث فى الميدان

الاستفتاء ومجلس الشعب وعصام شرف والجنزورى

حشد جديد للثوره , دعوات لاضراب , اعتصامات فى التحير وعند الداخليه ووزارة الدفاع

بتهيالى هيبقى عند حكاوى كتير اوى احكيها لولادى وصور وذكريات …..

مش ده المهم .. المهم حالة الحراك السياسى الى الثوره فجرتها عندنا .. وعندى بالاخص لدرجة انى بقيت مدمن سياسه ومن موال لموال

والاهم المكتسبات  والمفاهيم  الى بدأت تتحقق وتتكون من  للثوره

مصر بقى فيها 90 مليون مشتغل بالسياسه , كله بقى بيفهم سياسه وبيحلل ويفكر ويقول رايه ويحاور ويناقش والمشكله ان الاغلبيه العظمى مبتفهمش يعنى ايه راى اخر ولا يعنى ان فى فكر اعلى من فكرها ممكن تسمعه وتفكر فيه الاول وهتلاقى نفسها لوحدها اقتنعت … زى ما بيقولوا كده فكر الصفوه …احيانا بيكون خيالى او مش واقعى بالنسبه للوضع العام للمواطن المصرى لكن فى نفس الوقت افتكر اقرب مثال ليه هو فرحنا بوجود حكومه رجال اعمال هتقدر تحقق نهضه للبلد ايام حكومة نظيف ( مع اختلاف طبعا انهم كانوا ولاد كلب حراميه كل همهم جنى فلوس اكتر ) انما الفكره نفسها كانت حلوه بوجود شخص عملى واقعى متحضر مش هامه فلوس واحتياجاته متطور فبالتالى يقدر يبدع ويحقق حاجه احسن هيستفيد منها هو وفى نفس الوقت الشخص البسيط العادى الى ميعرفش فى حياته غير الاكل والشرب وبس

المهم فى النهايه اننا اكتشفنا واقع مرير ان البلد دى فيها تقريبا 100 الف شخص طموحين حالمين من مختلف الطبقات الماديه للمجتمع لكن تفكيرهم وتحركهم وترفعهم عن الاحتياجات البدائيه للحياه قريب من بعضه بيحاولوا يطبقوا كلمه ثوره بمعنى الكلمه من تغيير فى كل شئ فى المجتمع مش مجرد ازاله المخلوع لاستبداله باشكال اخرى كثيره واكتشاف الوان جديده للنهب والقتل واهدار الكرامه بدل من الوسائل التقليديه الى مبارك عودنا عليها

و 90 مليون الا 100 الف عايشين فى غياهب عالم تانى خاااااالص بتاثير الزمن والفقر المدقع والبهدله الى كان المخلوع معيشنا فيها ومخلينا مبنلحقش نتنفس يدوب ننكفى على وشنا نذاكر ونشتغل ولما نروح فى السنه اسبوع مصيف بنفرح اوى ونزعل واحنا راجعين على الفلوس الى صرفناها وكنا ممكن بدالها نجيب تلاجه جديده ولا تلفزيون جديد بدل الخربان الى عندنا ده

900 مليون الا 100 الف يمكن نصهم خريجى مدارس وجامعات لكن يا فرحتى , كام واحد منهم فعلا متعلم واستفاد باى حاجه من تعليمه مش مجرد شهاده عالحيطه والسلام , دفعة حقوق وتجاره الى بتوصل فى اوقات ل 6000 نفر واقنعنى ازاى ده كله بيفهم وبيتعلم فعلا بالاضافه لمنظومة التعليم المدرسى والجامعى الى كانت ومازالت ممتازه جداا وبتخرج عباقره

900 مليون الا 100 الف مشافوش فى حياتهم اى خبرات غير من خلال التلفزيون الى بيقدملهم الى الحكومه عايزياهم يقتنعوا بيه وبس فيا عينى بيصدقوا اى حاجه بتتقال فيه بينما الحدث الى بيشوفوه ادامهم سواء على ارض الواقع او من خلال فيديوهات او صور بيكدبوه مع انه لو اتذاع من التلفزيون هيصدقوه برضه !!!

90 مليون الا 100 الف يمكن نصهم بيعتبروا نفسهم شعب متدين عشان فيهم الى بيصلى وفى الى بيذكر ربنا وفيهم الى مش كافر واحيانا بيصوم رمضان ويصلى الجمعه فمعتبر نفسه كده متدين وبحكم ثقافتنا الريفيه والى كان اساسها الصوفيه والمشايخ والفقهاء ومقام سيدى مش عارف مين اتحول كل شيخ عندنا من واعظ دينى وفقيه لمفتى فى كل حاجه فى الدنيا ايا كانت وايا كان مؤهله وفهمه لها , واستغل الحاكم كده كويس وطوع لنفسه الازهر والافتاء يتكلموا بالى بيقوله ويحلوا حلاله ويحرموا حرامه وعن طريق التلفزيون يطلع يقوله الناس تصدقه مع انه لو تاب وقال عكس كده الناس كلها هتكدبه لانه ببساطه مش فى التلفزيون

90 مليون الا 100 الف اتحولوا لبغبغانات بيرددوا اى كلام بيتقال فى ودنهم وهم مش فاعمين اى حاجه من الى بيتقال ده وكل واحد فيهم هيقولك تعريف غير التانى لان ببساطه احنا عمرنا ماسمعنا الكلمات دى ولا نعرفها بس برضه التلفزيون هو الى قالها يبقى صادق فى حين اى حاجه تانيه تحصل فى البلد اى حتى تحاول تفهمهم ايه معنى الكلمات دى وانكم يا هبل اضحك عليكم والكلمات دى حاجه عاديه ومع ذلك ميصدقكش لان الى قال الكلام الى هو مقتنع بيه يا التلفزيون يا شيخ فى التلفزيون برضه !!

ممكن اقول كلام من النهرده لبكره لصدمتى فى شعب بالفعل جااااهل الا من رحم ربى وصدمتى الاكبر فى الشباب الجامعى المتعلم الى تفكيره منطقى ومع ذلك اتحول الى مجرد اله مستقبله لكذب الاعلام وافترائه وبغبغان لترديده بدون ما يحاول حتى يشغل عقله

————————————-

وقفه صغيره لازم اقفها هنا طالما هكى عن الثوره وعن اد ايه انفقعت .. وكلام ممكن صوابعى تتكسر قبل ما اخلص كلام عنه فهحاول اختصر

الاخوان المتأسلمون …

كنت من صغرى عضو فى الجماعه , بسمع الكلام ومطيع كالمعتاد من افرادها وبشارك فى كل حاجه وبحكم انى كنت من المتفوقين فالعين عليا ودكتور الاخوان بقى وحركات .. منكرش دورهم الكويس فى خلق روح الالتزام وحب المسجد والتدين وحفظ الواحد من الانحراف فى سن المراهقه الغبى , لحد ما خلصت الثانوى ودخلت الجامعه لمرحله تانيه من الانفتاح الاجتماعى والعقلى والتطور العاطفى وبدات افكر وبشكل سريع فى كل الاحداث السابقه معهم واد ايه كنت مغفل لاطاعة الكلام دون اعمال العقل , وكانت النتيجه طبعا انى سبت الاخوان كتنظيم مع الحفاظ على العلاقات الطيبه بالافراد

الاخوان كتنظيم ليه عده زوايا المفروض ينتقد من خلالها

– كافراد فهم كويسين جدا وناس محترمه كل فرد قائم بذاته ومتديين وناجحين ومترابطين جدا جدا

– دينيا : كافراد فكل واحد فيهم كويس دينيا وكمجموعه فهم بيساعدوك على الالتزام نوعا ما لو انت اصلا عندك الاستعداد بينما التوجيه الدينى المتطور بتطور مراحل العمر والدفع بكيمات من العلم الدينى المتوافق مع المرحله او حتى محاولة دفع الى معندوش استعداد للالتزام وانه يكمل على كده ومحاولة تثبيته لو بدا يبعد فهى عندهم ضعيفه جداااا

– سياسيا : ودى اكبر مشكله عندهم , بيطبقوا مبدا الشورى فى الحاجات التافهه الصغيره العاديه وتقتنع بالمبدا وانه بيتنفذ فعلا بينما السيياسات العليا بتيجى باوامر من فوق وبتتلمع شكلها عشان لما توصل للى تحت يكون اول متوعد على مبدا الطاعه فهينفذ وحتى لو مستساغش الكلام يكون متملع فينفذ برضه عادى بينما لو بالفعل اعمل عقله فيها هيلاقى غريبه جدا بدليل الهجوم الكبير من المثقفين وال 100 الف الى بيفهموا على الاخوان وسياساتهم المتضاربه وافعالهم واقوالهم الى بتدل على ان هدفهم الوحيد هو مجرد الوصول للسلطه , طب عايز سلطه ليه؟؟ متعرفش , السلفيين كانوا اكثر احتراما منهم رغم عنفهم السياسى والدينى لكن هدفهم من السلطه هو تطبيق الشرع بينما الاخوان ومن واقع جلسات مجلس الشعب متفهملهمش هدف !!

ببساطه كان فى رايى الشخصى قبل الثوره اساسا … الاخوان لو عايزين ينجحوا  , ياخدوا الجانب الدينى بس ينموه ويطوروه وينشروه بشكل جدى فى المجتمع يعمل طبقه متدينه كويسه الاول بعد كده يقدر يتحرك من خلالهم للبناء , فى الواقع هم بنوا طبقه مسيره منقاده معجبه بالشكل والمظهر المتدين وجاهزه لسماع الكلام لاحساسهم ان ممثلى الدين هم المنقذ من الفقر والنهب وده طبعا اسهل كتييييييييييير من بناء مجتمع حقيقى على عكس ما عمل اردوغان فى تركيا باعتماده على بناء المجتمع وليس التلميع والتمجيد لشخصه او لحزبه

المشكله الى مش عارف هم ازاى اغبيا مش واخدين بالهم منها دلوقت فى تحالفهم الغير معلن والمفضوح مع العسكر .. ان يا اخى حتى من التاريخ بص وانت تعرف ان العسكر يمسك الحكم زى الفريك ميحبش شريك , وانت كده كده نبرتك هتتغير فى مره هتقول حاجه متعجبوش فى مره ويقلب عليك وخصوصا ان معاك دلوقت شعب بدا يفتح مش هتعرف تضحك عليه كتير , وابسط واسهل ما يكون عند العسكر وزى ما حصل فى التاريخ هيرميك تانى فى المعتقلات ويبهدلك وبشتتك  ………. لكن المره دى خلى بالك …… فى ناس كتيييييييييير جدااااااااااااااا مستعده تشمت فيك وتقولك تستاهل ما احنا كنا واقفين وراك ودخلناك المجلس وطالبنا تمسك السلطه وانت الى رفضت وانقلبت علينا , وساعتها هتلاقى 100 الف واحد يحاربك فى كل مكان بمجرد خيانة العسكر ليك زى ماخنت شعبك وعمر ما هتقوملك قومه تانى … احذررررررر من اليوم ده لانى الحمد لله مبحبش الشماته بس هكون من الناس الى هتدوس على رقبتكم عشان ميقوملكمش قومه تانى وارمى فوقكم التراب

اللذيذ بقى فى الموضو ده كله .. شخصيا وبالمثل اغلب ال 100 الف شخص او يزيدون الى هم المفترض صفوة المجتمع او الناس الى بيتقال عليها رايقه واهاليها بيصرفوا عليها

كل الناس دى موجوده فى مصر لفتره محدوده من الزمن هو تخرجهم من الحرم الجامعى وقضاء الخدمه العسكريه واستعدادهم بعد كده للسفر للخليج او اوروبا والدول المتقدمه ويرجعوا مصر بعد كده وهم عندهم 60 سنه يرتاحوا بقى ويموتوا على ترابها

الناس دى قامت بالثوره عشان نفسها بلدها تبقى احسن والحال ينصلح للناس الفقيره العاديه قبلهم لانهم ببساطه لا خسرانين ولا كسبانين غير انهم هيقعدوا فى بلدهم النضيفه بدل الغربه .. ,,

يعنى فى النهايه الثوره دى لو نجحت هنعيش كلنا عيشه فل , طب لو مانجحتش !!!!

الناس دى كلها اماكنها بره مصر تعتبر محجوزه او مخطط لها من وهم اطفال او حتى شباب فى الجامعه ومعاهم كل عقل مفكر ومخترع ومبدع فى اى مجال فى البلد دى

وفى النهايه الى هيتبقى واحد من اتنين :

واحد بسيط فرح بالثوره وفكر ان البلد هتنضف ويعيش عيشه نضيفه بدون مرمطه وبكرامه .. وده هيصعب عليا اوى

ومواطن شريف من ال 90 مليون الا 100 الف وده اقدر اقوله هنيئا لك بالعبوديه

وشكرا

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s